Ҳомиладорликнинг 19-ҳафтаси

Ҳомиладорликнинг 19-ҳафтасига келиб, кўпгина аёллар болажоннинг ғимирлашини сеза бошлайдилар. Айримлар ҳар бир ҳаракатни аниқ ҳис қилади, бошқалар эса илк «капалак парвози»ни тахмин қиладилар. Бўлғуси онанинг вазни секин-аста ортиб боради, сон ва ёнбошлар кенгаяди.

Бола ҳам ўсмоқда, вазни ортиб, борган сари кичик одамчага ўхшаб бормоқда. Ҳомиладорлик ўзининг экваторига яқинлашмоқда, бу эса қувонч уйғотмай қолмайди.

Ҳомиладорликнинг 19-ҳафтасида нима рўй беради

Ухлаш учун қулай ҳолатни топиш тобора қийинлашади. Қорни билан ётиш қатъиян ман этилади, қолаверса, бу жуда ноқулай ҳам. Чалқанча ётиш ҳам тавсия этилмайди, чунки бачадон пастки ковак венани босиб қўйиши мумкин, бу эса хавфли ҳолатдир. Энг мақбул ҳолат — ёнбошлаб, оёқларни бироз букиб ётиш. Икки оёқ орасига ёки оёқ остига ёстиқ қўйиб ётиш ҳам қулайлик беради.

Бачадон ўсиши сабабли тос ва бел соҳасида оғриқли сезгилар пайдо бўлиши мумкин. Тос суяклари аста-секин кенгая бошлайди ва бу ҳар доим ҳам оғриқсиз кечмайди. Аммо қорин остида тортишиб келадиган оғриқлар хавотирли ҳисобланади, енгил ноқулайлик эса меъёрга киради.

Бир ҳолатда узоқ ўтирманг, суянчиқли курсилар сизнинг энг яхши ёрдамчингиз бўлсин. Оёқни оёқ устига қўйиб ўтиришдан ва баланд посҳнали пойабзалдан бутунлай воз кечинг.

Ҳомиланинг 19-ҳафтасидаги аҳволи

Боланинг бош мияси жадал ўсиб, фаол ривожланмоқда. Бу унинг ҳаракатларида ҳам акс этади — илгариги тартибсиз қимирлашлар аста-секин мувофиқлашган ҳаракатларга айланади.

19-ҳафта — бронхиал дарахт шаклланиб борадиган давр. Нафас олиш тизими такомиллашаётган бўлади. Шу билан бирга ёғ безлари фаол ишга тушиб, ҳомилани амниотик суюқлик ва микроблардан ҳимоя қилувчи оқ-кулранг ёғсимон қопламани ишлаб чиқаради.

Бу ҳафтада боланинг бўйни мустаҳкамланади, у бошини 180 градусгача буриши мумкин. Ҳомиланинг бўйи думғазасидан бош учигача тахминан 15 см, вазни эса 200 грамм атрофида бўлади.

Болажон сигнал бера бошлайди

Энди она боласини жисмонан ҳис қила бошлайди ва улар орасида руҳий боғлиқлик пайдо бўлади. Илк ғимирлашлар боланинг мавжудлигини янада яққол ҳис қилишга ёрдам беради.

Бу даврда онанинг кайфияти, одатда, барқарор бўлади. Айрим ҳолларда чарчоқ сезилиши мумкин, лекин ўзингизни ҳаддан ташқари толиқтириш мумкин эмас. Ўзингизни ва болажонингизни асранг, зарур пайтда дам олинг.

Таомноманинг асоси — бўтқалар ва мол гўшти

Қовурилган, ёғли, аччиқ ва дудланган овқатлардан воз кечиш керак. Ширинликлар ва тузламалар ҳам қатъий назорат остида бўлиши лозим.

Кальций ва темирга бой маҳсулотлар эса аксинча, рационингизда муҳим ўрин эгаллаши шарт. Гречка, сули бўтқаси, курага, черника, томат шарбати ва мол гўшти жуда фойдали ҳисобланади.

Кам-камдан, лекин тез-тез овқатланинг. Тунда тамадди қилишдан тийилинг.

19-ҳафтада УЗИ

Қондаги шакар ва гемоглобин миқдорини текшириш, сийдикдаги оқсилни аниқлаш вақти келади. Зарур бўлса, шифокор прогестерон даражасини текшириш учун қон таҳлилини тайинлайди.

Айрим ҳолларда 19-ҳафтада иккинчи мажбурий УЗИ ўтказилиши мумкин. Унда боланинг юрак уриши, ҳаракат фаоллиги, эҳтимолий нуқсонлар, бачадон ва амниотик суюқлик ҳолати баҳоланади.

19-ҳафтадаги сезгилар

Бу даврда ҳомиладорликни яшириш деярли имконсиз. Қорин яққол кўриниб туради, вазн ошиши ҳам алоҳида ҳолатни намоён қилади.

Бачадон ўсиши билан юриш ҳам ўзгаради. Бу посҳнали пойабзалдан вақтинча воз кечиш учун энг тўғри пайтдир.

Тери чўзилишига қарши кремлардан фойдаланишда давом этинг, тишлар ва сочларга эътибор беринг. Кейинчалик стоматолог креслосида узоқ ўтириш қийинлашади, шунинг учун муаммоларни ҳозироқ ҳал қилиш мақсадга мувофиқ.