Ҳомиладорликнинг 40-ҳафтаси

Туғруқни кун сайин эмас, ҳатто соат сайин кутиб ўтганмиз. У исталган пайтда бошланиб қолиши мумкин. Яратганнинг Ўзи бу муддатни белгилаб берган, бизларнинг ҳисоб-китобларимиз эса фақат тахминий чамалашга асосланади.

Кичкинтой ўзини қандай ҳис қилади

Болакай бачадонни бутунлай эгаллаб олган, унинг ҳаракатлари секинлашмоқда, фаолроқ бўлиш учун унга жой торлик қилади.

Ҳозирги пайтда боланинг вазни 3,2–3,8 кг ни, бўйи эса 50–54 см ни ташкил этади. Бу айнан туғруққа оид параметрлардир. Бинобарин, қизлар енгилроқ вазнда, аммо ўғил болаларга қараганда бўйчанроқ бўлиб туғилишлари мумкин.

Бачадон ичида ётар экан, болажонингиз қоронғуликдан, сўнгги ҳафталарда эса жойнинг торлигидан чарчаб кетди. Эстроген миқдорининг юқорилиги сабабли ҳозир унинг кўкрак безлари бироз дўппайган, буларнинг барчаси туғруқдан кейин бир неча ҳафта ўтгач ўз ўрнига тушади. Янги туғилган қиз чақалоқларда мазкур эстрогеннинг кўпайиши оқибатида вагинал ажралмалар чиқиши мумкин. Ҳали туғилиб улгурмаган болаларнинг ичагида йиғилиб қолган меконий (дастлабки ахлат) стерил бўлади, лекин бола туғилиши биланоқ ичакка турли хил микроорганизмлар жойлашиб оладилар.

Қандайсан, чақалоқ?

Янги туғилган чақалоқ ота-онасини ҳар томонлама ҳайратда қолдириши мумкин. Биринчидан, у одатда кутилган санадан бир неча кун фарқ қилувчи туғилган куни билан ажаблантиради. Иккинчидан эса ташқи кўриниши билан ҳайратга солади.

Эндигина туғилган болалар ғаройиб кўринишли бўлади: боши нотўғри шаклга эга бўлиши мумкин (лекин у 1–2 кун ичида тўғриланиб кетади); терисининг ранги ғайритабиий — кулранг-кўкишдан тортиб, жигарранг ва ҳатто сарғиш рангда ҳам бўлиши мумкин. Бинобарин, болакайнинг териси ҳали сирсимон мой (vernix caseosa), қонингиз ёки меконий билан қопланган бўлиши эҳтимолдан холи эмас.

Бундан ташқари, чақалоқнинг баданида пигмент доғлари ёки қасмоқлар учраши мумкин, улар вақт ўтиши билан йўқолиб кетади.

Чинқириш — шарт

Ўзининг туғилганини билдириб, овоз чиқариб чинқириш ҳар бир чақалоқнинг мажбуриятидир. Биринчи чинқириши билан у илк бор нафас олади, ўпкасини ростлайди ва мустақил нафас олишни бошлайди.

Агар болакай йиғлашни истамаса, уни енгилгина шапатилаб йиғлатишади.

Она ўзини қандай ҳис қилади

Ниҳоят, она ҳажман катталашишдан тўхтади, қўшимча 12–16 кг вазн тўплаб олгач, энди у туғруққача шу вазнда қолади. Бачадон мумкин қадар катталашиб бўлди ва ҳозир қов симфизидан 36–40 см, kindикдан эса 16–20 см масофада жойлашган.

Қорин териси шу қадар қаттиқ тортилганки, баъзи-баъзанда унда қичишишлар сезилади. Ҳомиладорликнинг 40-ҳафтасида шиллиқ тиқин чиқиб кетади, тўлғоқ бошланади.

40-ҳафтада оналарни икки савол безовта қилиши мумкин:

Нима учун кичкинтой ҳалигача туғилмади?
Агар у туғилишни истаб қолса, нима қилиш керак?

Тинчланинг. Болангиз жисмонан ва руҳан тайёр бўлганидан кейингина туғилади. Онадан ҳам кўра кўпроқ хавотирга тушаётган қариндошлар ҳам тинчланишлари лозим.

Иккинчи туғруқ

Шундай қилиб, мана ҳомиладорликнинг 40-ҳафтасидасиз — кейинги туғруқлар аввалгиларига нисбатан, шубҳасиз, фарқ қилади. Буни ҳар бир гинеколог тасдиқлайди. Лекин уларнинг қанча давом этишини ҳеч ким аниқ айта олмайди. Бачадон бўйни кейинги туғруқларда осонроқ очилади, чунки организм бу жараённи аввал бошидан кечирган. Шу сабабли тўлғоқлар даврийлиги аввалгиларига қараганда қисқароқ бўлади.

Ҳомиладорликнинг 40-ҳафтаси: қорин тошдек қотади

Статистикага кўра, кўп аёллар айнан шу даврда туғишади. Ҳомиладорлик муддати катта, болакай бугун-эрта дунёга келиши мумкин. Шу боис, агар ҳомиладорликнинг 40-ҳафтасида қорин тошдек қотса, тўлғоқни эслатувчи оғриқлар даврий равишда тез-тез пайдо бўлса, қорин пастга тушиб кетса — буларнинг барчаси туғруқ фаолияти бошланаётганидан далолат беради.

Энг муҳим палла

Туғруқ бошланишини кутар экансиз, хотиржамликни йўқотманг. Майда-чуйдаларга асабийлашманг. Яхши кайфиятни сақлаб юринг. Тўлғоқлар пайтида релаксация ва тўғри нафас олиш машқларини бажаринг. Сизнинг организмиңиз бу паллага узоқ вақт тайёргарлик кўрган. Мана, у етиб келди. Ҳақиқий тўлғоқлар бошланганида аввал ишлаб чиқилган режага мувофиқ, ваҳимасиз ва шошилмасдан ҳаракат қилинг.

Сиз жуда катта ишни бажардингиз! Сиз бу мураккаб йўлни тўлиқ босиб ўтдингиз! Сизнинг мукофотингиз — фарзандингиз! Янги инсон ва давомчингиз! Муборак бўлсин!