Ҳомиладорликнинг 39-ҳафтаси

Ҳомиладорлик тўққизинчи ойи ўртаси. Агар сиз ҳали туғмаган бўлсангиз, ҳомиладорликнинг 39-ҳафтасида фарзандингиз дунёга келиш эҳтимоли жуда катта.

Болакай «дунёга чиқиш» учун тўлиқ тайёр. Онанинг организми ҳам тайёр. Буёғига жуда оз қолди.

Кичкинтой ўзини қандай ҳис қилмоқда

Болажон шаклланиб бўлган ва ўсишда давом этмоқда. Деярли мустақил одамчанинг вазни ҳозир 3–3,5 кг, бўйи — 50–53 см ни ташкил этади. Она бағрида экан, барча озуқа моддаларини киндик ва йўлдош орқали олади, ўпкаси эса биринчи нафасни олишга тайёр турибди. Ичакда озиқани ҳаракатга келтириш учун хизмат қилувчи тукчалар шаклланиб бўлган, ошқозонда уни парчалаш учун зарур ферментлар ишлаб чиқарилмоқда.

Болажон ўмбалоқ ошиши учун жой етарли эмас — ўзи анча катта бўлиб қолган-да. Териси ёқимли оч пушти рангга кирган, бу тери ости асосининг яхши ривожланганидан дарак беради.

Кичкинтой кўзларининг кўриши эмизиш вақтидаги онанинг юзи масофасига мослаша олади — 20–30 см. Кичкинтойнинг ўткирлик ва контрастлик бўйича сезувчанлиги ривожланмоқда, ҳозирдан унда яққол ва рангли кўриш, ҳаракат ва лип-лип ўтишларга сезувчанлик бор.

Киндикни кесиш қоидаси

Киндик бутун ҳомиладорлик вақти мобайнида ўзининг муҳим хизматини ўтайди. Энди туғруқдан кейин ҳам уни жуда ҳам эҳтиёткорлик билан парвариш қилиш керак.

Ҳомиладорликнинг 39-ҳафтасида киндик боланинг бўйнига ўралиб қолиши эҳтимоли бор. Шуни эътиборга олган акушерлар болани жуда эҳтиёткорлик билан чиқариб оладилар, жонланиб ётган киндикнинг тўхташини кутиб туриб, кейин олдиндан икки томондан сиқиб, спирт билан ишлов берган ҳолда уни кесишади.

Кесилгандан кейин киндикнинг калта томони қуриб, тушиб кетади. Буларнинг ҳаммаси туғруқдан кейин тахминан 5–7 кун ичида юз беради. Яна бир воқелик — болакай чиройли киндикчали бўлиб қолади.

Она ўзини қандай ҳис қилади

Ҳомиладорликнинг 39-ҳафтасига етганда сиз 11–16 кг вазн тўплаган бўласиз. Энди ортиқча тўлиш кузатилмайди, аксинча — бироз вазн йўқотиш ҳам мумкин.

Бачадон туби масофаси қов симфизидан — 36–40 см, kindикдан — 16–20 см ни ташкил этади. Бачадон туби пасаяди, ҳомиланинг олд қисми туғруқ каналининг юқори қисмига кириб боради.

Туғруқ аломатлари тез орада ўзини кўрсата бошлайди! Йўлдош қариётган бўлади, кичкинтой кислород танқислигини ҳис қилмаслиги учун тоза ҳавода кўпроқ бўлишга ҳаракат қилинг. Бачадон қовуққа кўпроқ босим ўтказади, шунинг учун чот орасида санчилувчи оғриқлар пайдо бўлиши мумкин. Тўлғоқлар тутиши мумкин: улар ёлғондакамми ёки чинми? Туғруқ вақти келган-келмаганини аёлнинг ўзи ёки шифокор аниқлаб беради. Тўлғоқ пайтида энг муҳими — ваҳимага тушмаслик. Худо хоҳласа, ўз вақтида ва муваффақиятли туғиб оласиз.

Ҳомиладорликнинг 39-ҳафтаси: қорин тошдек қотади

Туғруқдан олдинги сўнгги босқич етиб келди. Айрим охирги «қийинчиликлар» қолди, холос, шундан кейин болажонингиз бағрингизда бўлади. Ҳомиладорликнинг 39-ҳафтасидаги ноқулайликлар: қорин тошдек қотиши, вақти-вақти билан тўхтаб қоладиган тортувчи оғриқлар, қўл-оёқларнинг шишиши. Буларнинг барчаси яқин орада тугайди. Кичкинтой туғилгандан сўнг сиз буларнинг барчасини унутасиз.

Ҳомиладорликнинг 39-ҳафтаси — туғруқ даракчилари:

– орқа ва бел соҳасидаги тортувчи оғриқлар;
– шиллиқ тиқиннинг ажралиши;
– қорин спазмлари (оралиғи соатига 5 мартдан кўп);
– қонли ажралмалар;
– иштаханинг ошиши;
– ич кетиши ёки суюқ келиши;
– ҳомила атрофидаги сувларнинг оқиб кетиши.

Ўз ҳолатингизни кузатиб боринг: туғруқ даракчилари йўл-йўриқ кўрсатади, нима қилиш кераклигини танангизнинг ўзи сизга билдиради.

Иккинчи ҳомиладорлик

Агар сиз ҳомиладорликнинг 39-ҳафтасида турган бўлсангиз ва бу иккинчи ҳомиладорлигингиз бўлса, билиб қўйинг: туғруқ олдиданги белгилар илк бор туғадиган аёллардагига ўхшаш бўлади. Бироқ иккинчи туғруқ аввалгидек кечмайди — бола туғруқ йўлларидан тезроқ ўтиши сабабли жараён анча тезлашади. Организмингиз биринчи тажрибадан келиб чиқиб, ҳаммасини «ўзи яхши билади».

Танангизга ишонинг, ўзингизни бўш қўйинг — ҳаммаси яхши бўлади!

Ўзаро қўллаб-қувватлаш

Ҳозир сизга энг керакли нарса — қўллаб-қувватлаш. Қариндошлар, яқинлар, сизга меҳр қўйган инсонларнинг кўмаги жуда муҳим. Баъзан битта илиқ сўз дунё-дунё дори-дармон ўрнини босиши мумкин.

Сиз ҳомиладорликнинг 39–40-ҳафталаридасизми? Биласизми, ҳозир болажонингизга энг керакли нарса нима? Сизнинг қўллаб-қувватлашингиз! У дунё юзини кўришга тобора шошилмоқда. Унга ёрдам беринг. Болажонингиз билан гаплашинг, «ҳаммаси яхши бўлади» деб унга айтиб туринг. Шунда кўрасиз — Худо хоҳласа, ҲАММАСИ ЯХШИ БЎЛАДИ!