Ҳомиладорликнинг 8-ҳафтаси

Ҳомиладорликнинг 8-акушерлик ҳафтаси олтинчи эмбрионал ҳафтага тўғри келади. Агар одатий ойлар бўйича ҳисобланадиган бўлса, бу иккинчи ойнинг тугашидир. Бу вақтда аксарият аёллар ҳомиладор эканликларини билган бўладилар. Билмаганлар ҳам бунга эътибор қарата бошлайдилар, сабаби ушбу вақтда белги-аломатлар кучайиб боради. Шундай қилиб, бу вақтда аёл ва эмбрионда қандай ўзгаришлар юз бераётган бўлади?

Ҳомиладорликнинг 8-ҳафтасидаги сезгилар
Аввал пайдо бўлган ҳомиладорликнинг белги-аломатлари бу вақтга келиб янада яққол сезила бошлайди. Гормонлар даражаси ошиб боради ва бу сиртдан қараганда кайфиятнинг тез-тез ўзгариши, йиғлоқилик, серуйқулилик билан намоён бўлади. Бачадон ҳам ҳажман катталаша бошлайди. Гарчи аёл буни ҳали аниқ ҳис қилмаса-да, ички органларига босим ортиб, ноқулайликлар пайдо бўлади. Сийиш тез-тез қистайди, қабзият пайдо бўлиши мумкин.

Ҳомиладорликнинг 8-ҳафтасида ажралмалар ҳам кўпайиши мумкин, аммо агар улар қичима ва ачишиш билан кечмаса, хавотирга ўрин йўқ. Айрим аёлларда жигарранг ажралмалар кузатилиши мумкин. Агар белда оғриқ бўлмаса ва умумий аҳвол ёмонлашмаса, бу ҳолат хавфли ҳисобланмайди. Шунга қарамай, бу ҳақда шифокорни хабардор қилиб қўйиш тавсия этилади.

Бу даврда токсикоз аксарият ҳомиладор аёлларнинг асосий муаммосига айланади. Доимий сўлак оқиши, овқатдан безиш, қайт қилиш нормал овқатланишга халал беради. Кўпчилик аёллар бу ҳолатни бошидан кечиради, аммо агар қайт қилиш кунига 5 мартадан ортиқ такрорланса, албатта шифокорга мурожаат қилиш лозим.

Ҳомиладорликнинг 8-ҳафтасида ҳомиланинг ривожланиши
Ушбу ҳафтада кичкинтой янги босқичга ўтади. Энди у муртак эмас, балки ҳомила деб аталади. Йўлдош ривожланишда давом этади, бачадон-йўлдош қон айланиши яхшиланади. Шу ҳафтадан бошлаб ҳомила озиқ моддаларни киндик орқали ола бошлайди.

Ҳомиланинг ҳажми жуда кичик — бор-йўғи 1,5–2 см бўлишига қарамай, у аллақачон одамга ўхшаш қиёфага эга. УЗИ текширувида унинг қўлчалари, оёқчалари ва боши аниқ кўринади. Юз бичимлари шакллана бошлайди.

Ички органлар фаол такомиллашиб боради. Юрак тўрт камерали бўла бошлайди, ўпкада бронхлар дарахт шохларига ўхшаш тарзда тармоқланади, буйраклар шаклланади. Жинсий аъзоларнинг асоси қўйилади: ўғил болаларда — тухумлар, қизларда эса — тухумҳужайралар ҳосил бўладиган тухумдонлар ривожлана бошлайди. Аммо ҳали боланинг жинсини аниқлаш мумкин эмас.

Асаб тизими жадал суръатларда ривожланади. Кичкинтой фаол ҳаракат қила бошлайди: қўл ва оёқчаларини қимирлатади, уларни сиқиб-очади, бир томондан иккинчи томонга ағдарилади. Бу ҳаракатларни УЗИда аниқ кўриш мумкин, аммо ҳомила ҳали жуда кичик бўлгани учун она бу ҳаракатларни сезмайди. Ҳомиланинг қимирлашини ҳис қилишга ҳали бир неча ой бор.

Мазкур ҳафтага келиб барча асосий органлар шаклланиб бўлган бўлади. Кейинги ҳафталарда янги аъзолар пайдо бўлмайди, мавжуд органлар такомиллашади, ҳомиланинг ўзи эса ўсиш ва вазн йиғишда давом этади.

Шифокор кўриги
Агар аёл ҳали ҳомиладорлик бўйича ҳисобга турмаган бўлса, ҳозир буни қилишнинг энг қулай вақти. Шифокор кўрикдан ўтказади, ҳомиладорликни тасдиқлаш учун зарур таҳлилларга йўлланма беради, керакли витаминларни белгилайди ва УЗИ текширувини тайинлайди.

Гинекологдан ташқари терапевт, стоматолог ва венеролог кўригидан ўтиш ҳам зарур. Шуни ёдда тутиш керакки, гарчи 8-ҳафтада қорин бироз чиққандек туюлса-да, буни шифокорга албатта маълум қилиш лозим. Ҳар бир ҳомиладорлик ўзига хос бўлади, аёлларнинг қомати ҳам турлича.

Агар бўлғуси онанинг сурункали касалликлари бўлса ёки у доимий равишда дорилар қабул қилаётган бўлса, бу ҳақда даволовчи шифокорни огоҳлантириш шарт. Зарур ҳолларда қўшимча таҳлил ва текширувлар тайинланади, дориларни қабул қилиш тартибига ўзгартиришлар киритилади.

Таҳлиллар
Қоннинг биокимёвий таҳлили аёл ички органларининг ҳолатини баҳолашга, қайси микроэлементлар етишмаётганини аниқлашга ёрдам беради.

Сийдик таҳлиллари:
– умумий таҳлил — буйраклар ҳолатини баҳолаш учун;
– Нечипоренко усули бўйича — яширин яллиғланишларни аниқлаш учун;
– қанд миқдорини аниқлаш — қондаги глюкоза даражасини баҳолаш учун.

Тавсиялар
Агар аёлни жиддий безовта қилувчи ҳолатлар бўлмаса, у одатий ҳаёт тарзини давом эттириши мумкин. Спорт билан шуғулланишга рухсат этилади, аммо жисмоний юкламаларни камайтириш керак. Жинсий алоқа ҳам тақиқланмайди, аммо агар бола тушиб қолиши хавфи бўлса, вақтинча чеклаш зарур.

Бу даврда кўп аёлларда толиқиш ва асабийлик кучаяди. Бундай ҳолатларни енгиллаштириш учун тоза ҳавода сайр қилиш фойдали. Овқатланишга алоҳида эътибор қаратиш лозим: сабзавотлар, мевалар, оқсилли ва сут-қатиқ маҳсулотлари кундалик таомномада бўлиши шарт. Пишириқлар, ширинликлар, қаҳва ҳамда аллергия чақириши мумкин бўлган маҳсулотларни чеклаш тавсия этилади.